តារាម៉ូដែលលំដាប់ជួរមុខ ប្រចាំប្រទេសចិន មោទនភាពដើរកាច់រាងពេក រអិលកែងស្បែកជើង ដួលអុកជង្គង់កណ្តាលឆាក ខ្មាសគេមិនស្ទើរ (មានវីដេអូ)
ចិន៖ តារាម៉ូដែលស្រីជនជាតិចិនម្នាក់ ដែលត្រូវបានគេស្គាល់ថា ជាកំពូលតារាម៉ូដែលលំដាប់ជួរមុខប្រចាំប្រទេស រងការម៉ាស់យ៉ាងខ្លាំង ក្រោយរអិលកែងស្បែកជើង ដួលអុកជង្គង់នៅកណ្តាលឆាក ខណៈពេលកំពុងតែដើរម៉ូត។
តារាម៉ូដែលស្រីវ័យ២៨ឆ្នាំ នាង Xi Mengyao មានកម្ពស់១,៧៨ម៉ែត្រ ត្រូវបានគេចាត់តាំងជាតារាម៉ូដែលប្រចាំប្រទេសម្នាក់ ចូលរួមក្នុងព្រឹត្តិការណ៍បង្ហាញម៉ូតប្រចាំឆ្នាំ Victoria’s Secret Fashion Show ដែលត្រូវបានរៀបចំធ្វើឡើង ក្នុងទីក្រុងសៀងហៃ ប្រទេសចិន កាលពីយប់ថ្ងៃច័ន្ទ ទី២០ វិច្ឆិកា ម្សិលមិញនេះ ដែលមានការចូលរួមពីសំណាក់ តារាម៉ូដែលស្រីជាច្រើនរូប ជាង៥០ប្រទេសមកពីជុំវិញពិភពលោកផងដែរ។
បើយោងតាមប្រភពេសារព័ត៌មាន បានឲ្យដឹងថា នៅពេលដែលនាង Xi Mengyao ដើរបង្ហាញខ្លួនលើឆាក ជាមួយនឹងម៉ូតសម្លៀកបំពាក់ ដ៏ស្រស់ស្អាតរបស់នាងមិនទាន់បានប៉ុន្មានផង រំពេចនោះក៏ស្រាប់តែភ្លាត់ស្នៀត រអិលកែងស្បែកជើង បណ្តាលឲ្យដួលនៅកណ្តាលឆាក ទាំងអាម៉ាស់មុខតែម្តង។
ភ្លាមៗនោះដែរ ក៏មានតារាម៉ូដែលស្រីម្នាក់ទៀត បានចូលមកចាប់ដៃ ជួយលើកនាងឡើង ខណៈគេឃើញថា Mengyao នាងនៅតែបង្ហាញស្នាមញញឹម ទាំងទឹកមុខរីករាយទៅកាន់ទស្សនិកជន និងអ្នកគាំទ្ររបស់នាង បើទោះឈឺចាប់យ៉ាងណាក្តី។
នាង Xi Mengyao និយាយថា «ខ្ញុំពិតជាសុំទោស ដែលធ្វើឲ្យគ្រប់គ្នាអស់សង្ឃឹមចំពោះខ្ញុំ ហើយក៏សូមអរគុណផងដែរ សម្រាប់អ្នករាល់គ្នាដែលតែងតែខ្វាយខ្វល់ ព្រួយបារម្ភលើនាងខ្ញុំ» ។
នាងបន្តថា ក្នុងអាជីពជាតារាម៉ូដែលអស់រយៈពេលជាង៧ឆ្នាំមកនេះ នាងក៏តែងជួបឧបសគ្គដួលជាច្រើនដងមកហើយដែរ ប៉ុន្តែនាងនៅតែរឹងមាំ ខំប្រឹងងើបឈរដើរជាធម្មតា បើទោះជារងការឈឺចាប់យ៉ាងណាក្តី ក៏ព្យាយាមតស៊ូរហូតទាល់តែចប់កម្មវិធី។
«មានផ្លូវវែងឆ្ងាយបន្តទៅមុខទៀត ហើយខ្ញុំនឹងមិនចុះចាញ់ឡើយ បើទោះបីជាមានឧបសគ្គ។ ខ្ញុំពិតជាអរគុណខ្លាំងណាស់ ដល់អ្នកទាំងអស់គ្នា ដែលតែងជួយលើកកម្លាំងចិត្តខ្ញុំកន្លងមក» ។ នាង Xi Mengyao និយាយ។
ទោះបីជាយ៉ាងណាក្តី អ្នកគាំទ្រលើរូបនាងជាច្រើន នៅលើបណ្តាញសង្គម បានបង្ហាញចំណាប់អារម្មណ៍ថា ការដួលនៅលើឆាកបែបនេះ វាមិនមែនជាបញ្ហាធំអីឡើយ។ ប៉ុន្តែផ្ទុយទៅវិញ ពិតជាកោតសរសើរដល់នាងយ៉ាងខ្លាំង ដែលនៅតែរឹងមាំ ប្រឹងជម្នះរហូតទាល់តែចប់ចុងចប់ដើម។
គួរឲ្យដឹងផងដែរថា Xi Mengyao ជាតារាម៉ូដែលដ៏មានប្រជាប្រិយភាពម្នាក់ និងថែមទាំងធ្លាប់បានចូលរួមក្នុងព្រឹត្តិការណ៍ដើរបង្ហាញម៉ូត Victoria’s Secret Fashion Show នេះ តាំងតែពីក្នុងឆ្នាំ២០១៣មកម្ល៉េះ។
នេះគឺជាលើកទីមួយហើយសម្រាប់នាង Mengyao ដែលបានគ្រងនូវឈុតសម្លៀកបំពាក់ដ៏ស្រស់ស្អាត ជាមួយនឹងគ្រឿងអលង្ការម៉ាកល្បីៗ ក្នុងព្រឹត្តិការណ៍បង្ហាញម៉ូតអាស៊ីនេះ។ ប៉ុន្តែជាអកុសល បែរជាជួបរឿងនឹកស្មានមិនដល់សម្រាប់នាងទៅវិញ៕
ទស្សនាវីដេអូខាងក្រោម៖
