គ្រូបង្វឹកថ្មី លោក ប្រាក់ សុវណ្ណារ៉ា បកស្រាយពីមូលហេតុដែល ច្រឹង ពលរដ្ឋ មានឈ្មោះក្នុងក្រុមជម្រើសជាតិ សាជាថ្មី

ភ្នំពេញ៖ បន្ទាប់ពីត្រូវបានសហព័ន្ធ តែងតាំងជាគ្រូបង្វឹកក្រុមជម្រើសជាតិកម្ពុជា លោក ប្រាក់ សុវណ្ណារ៉ា បានបញ្ចូលឈ្មោះកីឡាករចំនួន២៥នាក់ ដើម្បីហ្វឹកហាត់ត្រៀមការប្រកួតមិត្ដភាពក្នុងផ្ទះទល់នឹងក្រុមជម្រើសជាតិ មីយ៉ាន់ម៉ា នៅថៃ្ងទី៩ ខែវិចិ្ឆកា និងការប្រកួតជម្រុះពានរង្វាន់ AFC Asian Cup ទល់នឹងក្រុមជម្រើសជាតិហ្ស៊កដានី នៅថៃ្ងទី១៤ ខែវិចិ្ឆកា ឆ្នាំ២០១៧ ខាងមុខនេះ។

ខែ្សបម្រើរបស់ក្រុមក្រសួងការពារជាតិ កីឡាករ ច្រឹង ពលរដ្ឋ ដែលត្រូវបានដកចេញពីក្រុមជម្រើសជាតិអាយុក្រោម២២ឆ្នាំ អំឡុងការប្រកួត SEA Games លើកទី២៩ ត្រូវបានចូលរួមជាមួយក្រុមជម្រើសជាតិសាជាថ្មី។  

ច្រឹង ពលរដ្ឋ មានឈ្មោះសាជាថ្មី ក្នុងក្រុមជម្រើសជាតិ

ច្រឹង ពលរដ្ឋ ត្រូវបានដកចេញពីក្រុមជម្រើសជាតិ ដោយអតីតគ្រូបង្វឹកលោក Leonardo Vitorino កាលពីប្រកួតចុងក្រោយទល់នឹងក្រុមឥណ្ឌូនេស៊ី ក្នុងព្រឹត្ដិការណ៍ SEA Games ដោយបានចោទប្រកាន់ថា កីឡាកររូបនេះ បានផឹកគ្រឿងស្រវឹង មុនការប្រកួត។

លោក ប្រាក់ សុវណ្ណារ៉ា បានពន្យល់ថា ច្រឹង ពលរដ្ឋ បានដកចេញដោយលោក Leonardo មិនមែនសហព័ន្ធជាអ្នកដកនោះទេ ដូច្នេះរូបគេនៅតែអាចចូលរួមសាជាថ្មីជាមួយក្រុមជម្រើសជាតិ។

អតីតគ្រូបង្វឹកក្រុមបឹងកេត បានប្រាប់ដល់ទំព័រ TheMorning ថា៖ «រូបគេ (ពលរដ្ឋ) មិនបានដកចេញ ឫពិន័យពីខាងសហព័ន្ធនោះទេ តែត្រូវបានពិន័យដោយអតីតគ្រូបង្វឹក ដូច្នេះក្នុងនាមខ្ញុំជាគ្រូបង្វឹក ខ្ញុំអាចកោះហៅរូបគេ ឲ្យចូលក្រុមជម្រើសជាតិសាជាថ្មី»៕  

លោក ប្រាក់ សុវណ្ណារ៉ា គ្រូបង្វឹកក្រុមជម្រើសជាតិកម្ពុជា

លោក ប្រាក់ សុវណ្ណារ៉ា គ្រូបង្វឹកក្រុមជម្រើសជាតិកម្ពុជា

កីឡាករ ច្រឹង ពលរដ្ឋ

ច្រឹង ពលរដ្ឋ និងអតីតគ្រូបង្វឹក Leonardo Vitorino